Մասնաճյուղեր

Մհեր Աբեղյանի թանգարան

Էջմիածնի Մհեր Աբեղյանի թանգարանը հիմնադրվել է 1990 թ. հայրենի քաղաքին նկարչի նվիրաբերած գեղանկարչական և գրաֆիկական ստեղծագործությունների հիման վրա:

Ժողովրդական նկարիչ Մհեր Աբեղյանի արվեստը ձևավորվել է 1930-1940 թթ., սկզբում գրաֆիկական, այնուհետև գեղանկարի ասպարեզում: Ստեղծագործական ողջ ուղու ընթացքում նկարիչը հավատարիմ է մնացել իր գեղարվեստական լեզվին, իր գեղարվեստական ձեռագրին` ընդլայնելով և հարստացնելով այն:

Մհեր Աբեղյանը ստեղծագործում էր բոլոր ժանրերում: Նրա բնանկարներում իշխում են անդորրն ու հոգեկան հանգստությունը, նատյուրմորտները վառ են, տոնական ու կենսահաստատ, դրանց հատուկ է դեկորատիվ գունեղությունը: Մարդկանց կերպարները նկարչի հորինվածքներում  և դիմանկարներում լի են քնարականությամբ:

Մ. Աբեղյանը շատ է նկարել ածուխով, ծայրով, սանգինայով, զբաղվել է օֆորտով, սակայն նրա նախընտրած գրաֆիկական տեխնիկան լինոփորագրությունն էր: Տպագրական այս տեխնիկայով արված աշխատանքները գրավում են կատարման վարպետությամբ, մակերեսի գեղեցիկ մշակումով, գծի պոռթկունությամբ:

Մասնաճյուղում ներկայացված են նկարչի յուղաներկ կտավները, պարբերաբար ցուցադրվում է նաև նրա գրաֆիկան: Վարպետի ժառանգության զգալի մասը ցուցադրվում է ՀԱՊ-ի մշտական ցուցադրությունում:

Հասցե` ք. Էջմիածին, Կոմիտասի հրապարակ, Արմավիրի մարզ
Հեռ.` (+374 231) 5-49-41